АЕК: 82,5% од домаќинствата имаат пристап до интернет
Користењето на интернетот најмногу зависи од староста на лицата, но се забележува и значителна разлика во користењето на интернетот меѓу населението што живее во урбана и населението што живее во рурална средина...
Пристап до интернет имаат 82,5 проценти од домаќинствата, што е за 2,7 насто повеќе во однос на лани, додека 66,7 проценти од испитаниците лично ја користат оваа услуга приближно исто како и во 2013 година, покажува најновата анализа на Агенцијата за електронски комуникации.
Користењето на интернетот најмногу зависи од староста на лицата, но се забележува и значителна разлика во користењето на интернетот меѓу населението што живее во урбана и населението што живее во рурална средина, се вели во анализата.
Генерално, процентот на задоволни корисници од квалитетот и цените на услугите на интернетот е висок, но сепак, бележи мал пад во споредба со лани и тоа: во однос на квалитетот 3,5 проценти, додека во однос на цените 2,6 насто.
Најчести проблеми со кои се соочуваат корисниците на интернет се прекини и недостапност на услугата, 45,4 насто и непостојана брзина на конекција, 44,3 насто.
Во изминатите 12 месеци само 3,4 проценти од корисниците на интернет промениле оператор.