Велешки театар со две претстави на фестивал во Пловдив
На театарскиот фестивал во Пловдив, Бугарија, Велешки театар учествува со две претстави. Претставата „Едвард Втори“, по премиерата на Охридско лето ќе ја има и премиерата во театарот од Пловдив со кого е работена во копродукција…
Велешкиот театар е учесник на фестивалот „Сцена на крстопатот“ кој се одржува во Пловдив, Бугарија. На програмата се 11 претстави, меѓу нив и две во продукција на театарот „Јордан Хаџи Константинов-Џинот“, „Едвард Втори“ и „Нема струја за електричен строј“. Претставите ќе бидат одиграни на 14-ти и 15-ти септември.
Претставата „Едвард Втори“ на украинскиот режисер Андреј Жолдак ќе ја има бугарската премиера, бидејќи таа е копродукција со театарот од Пловдив.
На програмата ќе биде прикажана и претставата „Нема струја за електричниот строј“ во режија на Дејан Пројковски, која е работена по текст од бугарскиот автор Александар Секулов. Во двете претстави игра актерот Васил Зафирчев.
Фестивалот нема натпреварувачки карактер, а гости освен од Македонија има и од Грција. Соработката на театарот од Пловдив и велешкиот театар започна минатата година со учеството на Бугарите на фестивалот на античка драма Стоби, со претставата „Одисеј“.
Петар Печков