Изложбата „Горчлив Шеќер“ на Ѓорѓе Јовановиќ во МСУ

Изложбата „Горчлив шеќер“ на македонскиот уметник Ѓорѓе Јовановиќ ќе биде отворена вечерва во 20 часот, во Музејот на современа уметност. Куратори се Владимир Јанчевски и Благоја Варошанец.

Проектот е составен од два дела, просторна инсталација и анимации и видеа, осмислени како фрагменти од актуелната стварност и современиот живот, кои во себе содржат знаци, состојби и ситуации, кои истовремено функционираат во преиспитувањето на локалниот контекст, но овозможуваат и исчистување на влијанијата и меѓузависноста во глобалните текови.

Проектот претставува синтеза и надградување на историската авангарда, особено на дадаистичките и надреалистичките интервенции, во обид да ги трансформира и употреби во современиот контекст, обременет со предизвиците на постпандемиската политичка и технолошка реалност. Преплетувањето на реалното и надреалното и екстремните точки на нивното среќавање се одразува и преку спојувањето на разните жанрови, велат кураторите.