ЕУ избори: „Копјата ќе се кршат“ помеѓу Жан-Клод Јункер и Мартин Шулц

Последен ден од Европските избори.  Денеска се гласа во 21 држава членка на Унијата. Германија, Франција, Шпанија, Белгија - држави кои претставуваат  лавовски дел од огромното гласачко тело со над 500 милиони гласови кои ќе одлучуваат за идниниот состав на Европскиот парламент со вкупно 751 пратеник во Европската престолнина - Брисел, како и за новиот претседател на неформалната Влада на Европската Унија - Европската Комисија.

Првичните резултати ќе бидат објавени во 21 часот додека конечните доцна вечер во понеделник.  Доколку изборот за наследник на Баросо меѓу 6- те кандидати биде тесен, за позицијата прв човек на Европската комисија ќе одлучуваат  шефовите на државите и владите на самитот закажан на 27 мај во Брисел, метод на кој најостро се спротивставуваат најголемите партии во Европскиот парламент.

Според анкетите за расположението на Евопјаните и експертските анализи, копјата ќе се кршат меѓу Жан - Клод Јункер од централно десничарската Европска народна партија и претседател на Еврогрупата и актуелниот претседател на Европскиот парламент, Мартин Шулц, кој е кандидат на социјалистите и демократите.

Сепак познато е дека фаворит на лидерите на ЕУ е Жан- Клод Јункер. За претседател пак на Европскиот парламент ќе се гласа на конститутивната седница закажана од 1 до 3 јуни. 

Инаку одѕивот на гласачите од година во година е се помал.  Само за пример,  вчера во Латвија , Малта и Словачка своето право на глас го искористија само 19% од електоратот.

Што се однесува пак до Белгија, денеска се гласа на три гласачки ливчиња. Белгијците денеска гласаат за регионалните парламентарни, за фередални и за европските избори.

Марина Стојанова- Тонева, постојан дописник на МРТ од Брисел