„Сезона на глуварките“ на Блаже Миневски објавена на хрватски јазик

Книгата раскази „Сезона на глуварките“ од Блаже Миневски излезе на хрватски јазик во издание на „Тим пресс“ од Загреб. Преводот е на Томислав Ровичанец, како и поговорот на изданието. Расказите се преведени со поддршка на Европската преведувачка мрежа „Традуки“.

Станува збор за антологиска проза на универзален автор, не затоа што истовремено пишува романи, раскази, драми и есеи, не затоа што неговата проза спојува историски, психолошки и политички состојби, туку затоа што е повеќеслојна и со мноштво пораки – стои во најавата на хрватскиот издавач.

Романите на Миневски се преведени на англиски, полски, ерменски, бугарски, руски, словенечки, арапски, хрватски, кинески, српски и италијански јазик. Блаже Миневски е застапен во сите антологии на македонската кратка проза објавени последните триесетина години во Македонија и надвор од неа, а негови раскази се преведени на повеќе од дваесет јазици во светот.

Фото:/ Facebook/ Tim press