Соучениците да не молчат, да пријават булинг
Соучениците да не молчат да пријавуваат булинг во училиштата. Само на тој начин може да се надмине булингот кој нанесува психички и физички повреди, сметаат стручните лица. Во училиштата треба да се формираат и групи за медијација, во кои ќе се придобијат жртвите, но и оние кои вршат булинг …
Расте бројот на ученици кои пријавуваат булинг преку социјалните мрежи информираат стручните лица. Во Куманово на социјалните мрежи беа формирани групи каде жртви беа ученици. Но, психолозите најдоа начин да се вклучат во групите, преку учениците во т.н шема на поддршка. Појаснуваат булингот постоел, но се менуваат начините и формите. Порано се зборуваше за краткотрајно насилство. Денес булингот трае подолго и нанесува психички и физички повреди. Жртви обично се поповлечените деца.
„Секогаш оној кој врши булинг е помоќен и ја контролира жртвата. Последиците можат да бидат емоционални и психосоматски. Родителите, околината може да препознае по неколку знаци, повлекување, избегнување на активности, нервоза, обично подобрите ученици стануваат помалку успешни, одбегнување подрачја, личности, појава на анксиозност, може да дојде и до депресија, која е резултат на пролонгиран стрес“, вели Дивна Јанкова, психолог.
Психолозите посочуваат дека сајбер булингот мора да се следи. Но и да се придобијат жртвите, и оние кои вршат булинг во училиштата. Соучениците не смеат да останат неми набљудувачи.
Стручните лица укажуваат дека мора да се работи на подигање на свеста и кај учениците, но и родителите.
Во средното техничко училиште „Наце Буѓони“ веќе неколку години функционира група за медијација. Учениците промовираат толеранција и ненасилна комуникација. А токму тоа велат психолозите е начинот на кој ќе се спречи насилството.
Елена Георгиевска