Обезбедени речиси милион и половина учебници

По 15 години, нови учебници за 150 предмети ќе добијат учениците од средното образование. Етапно се печатат и се испорачуваат до училиштата – информираат од ресорот. До крајот на идната недела ќе бидат испорачани и учебниците за шесто одделение по природни науки, македонски и албански јазик. Учебникот по математика е одобрен и по завршување на жалбената постапка, ќе може да се печати. Учебниците пак за прво и за петто одделение, за кои Министерството има авторски права се веќе доставени до училиштата, исто како и учебниците од седмо и деветто одделение кои се во сопственост на издавачките куќи.

„Изработката на квалитетен учебник е комплексен процес што зависи од повеќе фактори, независни од системско влијание. Но, МОН ќе продолжи и во иднина навремено да ги спроведува своите надлежности, согласно со правната регулатива и да се заложува за обезбедување на квалитетни учебници за сите ученици – велат од Министерството за образование и наука.

Преку откуп на учебници за кои Министерството за образование и наука не ги поседува авторските права и со печатење на оние кои се во сопственост на МОН, досега за 2023 година е обезбеден тираж од речиси 1.4 милиони учебници. Од ресорот информираат дека над 98 проценти од нив, се веќе доставени.

Андријана Ѓурческа