Абдиу-Халили од Брисел: Северна Македонија, регионален лидер во ИПАРД програмата

Денеска во Брисел започна тридневниот билатерален скрининг за Поглавје 11, „Земјоделство и рурален развој“, кој е дел од Кластерот 5, „Ресурси, земјоделство и кохезија“. Поглавјето 11 опфаќа голем број обврзувачки правила, кои во најголем дел се директно применливи. 

Пред експертите на Европската комисија од Генералниот директорат за Земјоделие и рурален развој како и Дирекцијата за добрососедство и проширување, заменик главниот преговарач со ЕУ и државна секретарка во Секретаријатот за европски прашања (СЕП), Дрита Абдиу Халили изрази благодарност до Европската Комисија за досегашната поддршка во развој на македонското земјоделие и рурален развој, нагласувајќи дека Северна Македонија е лидер во регионот што се однесува до искористувањето на фондовите од ИПАРД програмата.

„Горди сме што го потпишавме Финансискиот договор за Програмата ИПАРД 3 на почетокот на октомври. Покрај тоа, реализацијата на ИПАРД 2 Програмата е над 98%. Ова ни дава поттик и надеж дека ќе имаме 100% реализација на ИПАРД 3 Програмата, бидејќи првиот јавен повик е веќе објавен, со што Северна Македонија ќе биде првата земја во регионот која ќе започне со спроведувањето на новиот ИПАРД програмски период“, рече во нејзиното воведно излагање Абдиу-Халили.

Дел од македонската делегација е и министерот за земјоделство, шумарство и водостопанство Љупчо Николовски, кој пред претставниците на Европската Комисија ги претстави најновите законски решенија, постоечката законска рамка, институционалните капацитети како и можностите и предизвиците со кои се соочува македонското земјоделие и руралниот развој. Освен Министерството за земјоделство, шумарство и водостопанство, кое е институција носител за ова поглавје, македонската делегација ја сочинуваат и претставници од: Агенцијата за финансиска поддршка во земјоделството и руралниот развој, Државниот земјоделски инспекторат, Агенцијата за храна и ветеринарство, Државна комисија за спречување на корупцијата како и на Секретаријатот за европски прашања.

Утре и задутре продолжува билатералниот скрининг за Поглавје 11, на кој ќе се презентира каков напредок имаме постигнато и што правиме за зајакнување на земјоделскиот пазар во нашата држава.