Мицкоски не очекува разрешница на скандалот со Онкологија

Изнесени се многу факти и докази и најмалку што може да се направи е Јавното обвинителство и останатите институции да реагираат по допрен глас, вели лидерот на ВМРО-ДПМНЕ, Христијан Мицкоски, за скандалот со Клиниката за онкологија. Со оваа влада не очекувам дека истрагата ќе дојде до крај, а виновниците изнесени пред лицето на правдата, вели Мицкоски.

А, на Мицкоски кој минатата недела објави нови документи, за кои рече дека покажуваат оти продолжува скандалот на Онкологија и дека лек на болните им се давал само половина доза, реагираат медицинските сестри од Онкологија. Го демантираат лидерот на ВМРО-ДПМНЕ, со тврдење дека се води евиденција за сè што се презема на Клиниката и како се даваат лекарствата.

„Апелираме до целата јавност, да престанат препукувањата на политичките партии преку клиниката, и да се остави клиниката да функционираа нормално и без било какви притисоци, со цел да се заштити здравјето на пациентите, кои секој ден доаѓаат на клиниката и се лекуваат, како и вработените во истата“, велат медицинските сестри од Онкологија.

Работата на Собраниската комисија за скандалот со клиниката, продолжува со сослушувања.

Миле Ристески