В година нови лекови на позитивната листа, ќе се воведуваат етапно

Лекови за малигни заболува, мултиплекс склероза, кардиоваскуларни заболувања и хемофилија – се најдоа на апликациите за ставање на позитивната листа. Надлежните очекуваат да биде објавена првата половина на идната година. За иновативната и скапа терапија здравствените власти од државната каса побарале дополнителни 2,9 милијарди денари.

Од фондот предупредуваат – новите лекови постапено да се внесуваат, за да не оптоварат буџетот.

„Доколку се внесат голем број на вакви молекули на позитивната листа од старт тоа најверојатно би предизвикало огромно оптоварување и на фондот, меѓутоа и на државниот буџет“, изјави Магдалена Филиповска Грашкоска, директор на Фондот за здравство.

„Ќе треба еден пореален систем којшто редовно ќе се ажурира затоа што новиот правилник кој се донесе и ги вметна дури и посебните договори дава една можност за сите овие препарати да бидат на поинаков начин третирани, да бидат побезбедно набавувани или ако сакате со попристапни цени“, вели Ана Данева Маркова – советник за здравство на премиерот.

Од веледрогериите со став – процедурите со тендерската документација го пролонгираат процесот со апликации во собирање научни докази за ефектите на одреден лек.

„Посебно за овие иновативни лекови секојдневно има нешто ново, и за сите останати лекови има. И тука се создава еден хаос во таа мала збрка да се подготвиш, да бидеш на време да биде се како што треба сработено“, изјави Весна Попова – претставник на веледрогерија.

Македонија заостанува во споредба со земјите во регионот кога станува збор за биолошката терапија. Позитивната листа на лекови не е ажурирана 15 години.

Андријана Ѓурческа