Најава за штрајк на Управата за водење на матични книги
Штрајк на Независниот синдикат на вработените од Управата за водење на матични книги. Вработените очекуваат нова средба со директорот на институцијата за исполнување на ветувањата кои им се дадени, бидејќи велат дека потпишаниот колективен договор е само на хартија, но не се исполнува во практика.
Независниот синдикат на Управата за водење на матични книги незадоволен од неисполнување на ветеното зголемување на платите може повторно да излезе на протести со привремен прекин на работата и штрајк како последна алатка за исполнување на нивните барања.
„Сакам да испратам порака до Министерството за правда и до Министерството за финансии и до директорот на Управата за водење матични книги, да обезбедат средства за вработените во управата за водење матични книги да им се покачат платите на вработените од 30 насто, што ги бараме цело време“, изјави Тони Милошески-претседател на Независен синдикат на Управа за водење на матични книги.
„Кога би се вратиле овие вработени во состав на Министерството за внатрешни работи, проблемот автоматски ќе биде решен бидејќи ќе добијат 30 насто за овластување кои ги имаат и тоа значи дека нивното барање во дел на финансиското ќе биде удоволено“, изјави Марјан Ристевски-претседател на Конфедерација на синдикални организации на Македонија.
Околу 500 вработени во управата за водење на матични книги во целата држава сметаат дека со враќање во состав на МВР ќе се исполнат нивните барања за поголема плата, но и ќе се избегне доцнењето на издавањето на документи на граѓаните.
„За да се запише едно новороденче ќе треба ние да ги праќаме сите предмети на МВР да се внесат за да добијат државјанство. Таа процедура иде со пошта и трае две недели. Зошто да чекаат граѓаните две недели? За ова мора под итно да се најде решение. Или да се вратиме во МВР или да најдат некој друг начин на којшто побрзо ќе можеме да ги услужиме странките“, рече Насер Џемаили-потпретседател на Независен синдикат на Управа за водење на матични книги.
Од Независниот синдикат бараат средба со министерот за правда и за финансии за решавање на проблемот.
Доколку нема договор следната недела повторно може да се активира штрајкот и граѓаните повторно да не можат да имаат документи од матичните книги.
Ирина Гелевска