Тутунарите бараат, откупувачите не даваат повисоки откупни цени
Течат роковите за почетокот на откупот на тутунот. До 15- ти декември треба да се отворат пунктовите, а производителите се незадоволни – откупувачите не го прифаќаат барањето за повисоки цени. Ова е по денешниот состанок на сојузот на земјоделските здруженија со откупувачите во Министерството за земјоделство.
Тутунарите се крајно револтирани и разочарани – кај откупувачите нема слух за зголемување на откупните цени на тутунот. Фирмите остануваат на ставот за досегашните цени – 300 денари за прва, 240 за втора и 180 за трета класа.
Производителите кои бараат зголемување од минимум 20 насто се непријатно изненадени од најголемиот откупувач Сокотаб, велат од Сојузот на земјоделските здруженија по денешниот состанок со откупувачите во Министерството за земјоделство.
Ваквата состојба и преполовеното производство ги ставаат тутунопроизводството, а и производителите, во незавидна ситуација.
Откупувачите се подготвуваат за кампањата. На секој пункт мора да има повереници. Незадоволството од цените останува.
Елизабета Митреска