До крајот на 2017-та за вработените во МВР 20% зголемени плати

10 илјади и 100 вработени во Министерството за внатрешни работи ќе добијат повисока априлска плата за 5 проценти што ќе се исплати во мај. До крајот на 2017-та вкупното зголемување ќе биде до 20 насто. Процесот на усогласувањето почнал пред неколку години и е резултат на, како што рече претседателот на Македонскиот полициски синдикат Тихомир Климовски, конструктивниот и одличен однос меѓу синдикатот и Владата.

„Овој паричен инпут, покрај зајакнувањето на стандардот на семејствата на вработените во министерството, и зголемувањето на мотивираноста во извршувањето на службените обврски, ќе овозможи и реализација на актите кои се во завршна фаза“, смета Климовски.

Усогласувањето на платите ќе трае во наредните две години, со крајна цел, платите на вработените во МВР да се изедначат со платите на цариниците. Од 2006-та година кога ВМРО-ДПМНЕ е на власт неколкупати се зголемија платите, кои сега се повисоки за 25 проценти, вели министерката за внатрешни работи Јанкулоска. До тогаш, основната плата на полицајците со средно образование беше 12 илјади и 700 денари. Сега таа изнесува 15 илјади и 356 денари.

„За оваа намена, за да може да се финансира покачувањето на платите, Владата обезбедува дополнителни речиси 250 милиони денари. Тие се потребни за исплата на платите до крајот на годинава. Инаку, усогласувањето ќе продолжи и ќе трае и во наредните две години,односно до крајот на 2017-та година“, појасни министерката за внатрешни работи Гордана Јанкулоска.

Паралелно со покачувањето, доколку се донесе евентуално ново зголемување на платите во јавната администрација, истото ќе важи и за вработените во МВР,најави Јанкулоска. Покрај зголемувањето на платите, во завршна фаза се и разговорите со синдикатот за нов колективен договор.

Милчо Велески