Владејачката партија на трибина во Гостивар

Државните институции имаат сила  да се справат со сите предизвици, изјави пред присутните  на трибината на владејачката партија во Гостивар, членот на извршниот комитет и вицепремиер Зоран Ставрески. Безбедноста на граѓаните е гарантирана, а владата ќе продолжи со реализација на проектите од нејзината програма.

„Кога и да е СДСМ во опозиција, секогаш прават проблеми и креираат ситуации се со цел на недемократски начин без поддршка на народот да се прибават до власт и да ја пренесат својата сопствена неспособност и проблемите кои ги имаат во својата партија врз државата. Ние сме тука за да им кажеме на граѓаните дека треба да бидат мудри, сплотени. Со мудроста и со разумот што го имаат граѓаните да ги погледнат состојбите, да ја оценат ситуацијата и да знаат дека народот е сплотен и сè додека народот стои зад нас, Македонија ќе остане стабилна и безбедна држава“, нагласи Ставрески.

Како што рече министерот за труд и социјала Диме Спасов, мрачните сценарија нема да не спречат во остварување на ветувањата. Тој говореше и за позитивните ефекти  од спроведените владини мерки со кои се опфатени сите граѓани.

Спасов посочи и на новите мерки на владата. Една од нив е зголемувањето на социјалната помош. Наместо ветените пет проценти, во јули таа ќе се зголеми двојно.

Наташа Гркова- Петрушевска