Нови 60 аудио книги достапни за лицата со визуелен хендикеп
Копии од овие книги ќе има и во Националната унивезитетска библиотека „Св. Климент Охридски“, како и во училиштето за слепи лица „ Димитар Влахов“...
Детски приказни, лектири за основно и средно образование, научна литература, книги за историјата на Македонија и дела на познати светски автори. Промовирани нови 60 аудиокниги за лица со оштетен вид од проектот „400 аудиокниги за лицата со визуелен хендикеп“.
„Овие книги ќе бидат поставени на нашата веб страница, од каде што ќе можат сите членови на нашиот сојуз литературно да се надградуваат“, изјави Жарко Селковски, Национален сојуз на слепи лица на Македонија.
Копии од овие книги ќе има и во Националната унивезитетска библиотека „Св. Климент Охридски“, како и во училиштето за слепи лица „ Димитар Влахов“.
„Досега се издадени 80 аудиокниги, а се очекува до крајот на оваа година да бидат промовирани уште 200 книги“, изјави министерот за труд и социјална политика, Диме Спасов.
Станува збор за проект од особено важен интерес за лицата со визуелен хендикеп кој ќе им помогне во образованието и култрурната надоградба.
„Во овие наслови се вклучени наградуваните остварувања на Венко Андоновски, Блаже Миневски, Стојан Тарапуза, Александар Прокопиев, но и значајните дела на најафирмираните поети, раскажувачи, романсиери, драмски автори и есеисти од светската литература како Коелјо, Свифт, Даниел, Кафка“, изјави министерката за култура, Елизабета Канческа Милевска.
Досега за овој проект се издвоени околу 2 и пол милиона денари.
Наташа Јанчиќ