Неопходна терапија за пациенти со ретки карциноми
Постојат ретки канцерогени болести во земјава за кои се неопходни терапии и лекови, велат неколку здруженија. Меѓу нив е и ракот на коскевата срцевина.
Животот на Драги бил во неизвесност пред една година, денот кога лекарите му дијагностицирале редок вид карцином на коскената срцевина. Пари за лекување немал, бидејќи една терапија достигнува и до 1.000 евра. Но, вели имал среќа, австриска компанија помогнала во лекувањето. Примил шест терапии, сега е добро.
„До шестата терапија резултатите се покажаа добри, сега за сега се чувствувам добро. Да има помош за да им се помогне, затоа што во болницата има многу болни со ретки карциноми. Тешко е да се снајдат пациентите, лековите се скапи, ова е скапа болест. Јас од Неготино доаѓам во Скопје и трошам по 100 евра на секоја терапија“, изјави Драги Лозаревски, пациент со МАЦ.
Во земјава има програма за финансирање на ретките болести, но не и ретки видови на карциноми. Потребни се нови лекови за овие болни, донациите не се долгорочни решенија- велат од Здружението на пациенти со ретки болести.
„Многу компании излегуваат во пресрет да им помогнат на критичните пациентите, но тоа не е долгорочно решение. Потребни ни се долгорочни решенија, а за тоа е доказ програмата за ретки болести дека таквите решенија се ефективни“, вели Весна Алексовска, Здружение на пациенти со ретки болести.
„Имаме капацитет и можност, и со добро релоцирање на основните средства и добра национална стратегија за контрола на ракот која што треба да се имплементира во Република Македонија ќе можеме на некаков начин да успееме да ја контролираме болеста“, изјави Биба Додевска, претседател на здружението „Борка“.
Бугарија го реши проблемот со нови лекови за ретките болести, во соседна Србија има приоритетна листа, Босна и Херцеговина не се откажува од терапијата, во некои делови од земјата овој проблем е решен, но во други е очаен.
„Многу е чудно што Македонија нема терапија, дека толку многу заостанувате зад другите држави. Во Македонија политичкиот систем е едноставен, дури и Босна и Херцеговина која помина низ некои ситуации има подобро здравство“, изјави Борислав Гуриќ, Здружение за ретки болести на БиХ.
Три милиони евра ќе се одвојат идната година во програмата за финансирање на ретки болести, а тие пари, според здруженијата на пациенти не се доволни за веќе постојните и ново дијагностицираните пациенти на кои ќе им бидат потребни лекови.
Андријана Атанасовска