Електронски картички за зелена нафта
Земјоделците кои ги загубиле или оштетиле елекртонските картички за купување на зелената нафта до 12 јуни треба да се пријават во подрачните единици на Министерството за земјоделство. Доколку ги исполнуваат условите ќе им бидат дадени нови картички. Вкупно за оваа намена се обезбедени 280 милиони денари за 60.000 земјоделци...
Сите земјоделци кои ланските картички за „зелената нафта“, ги оштетиле или загубиле, до 12 – ти јуни треба да се пријават во Подрачните единици на министерството за земјоделство за да им се изработат нови.
Нови картички ќе добијат и оние земјоделци кои за прв пат годинава се стекнале со правото на користење на оваа мерка. Ланските картички се важечки и ќе бидат надополнети со парите предвидени за оваа година.
Зелената нафта ќе се добива врз основа на големината на земјоделската површина и видот на земјоделските култури. Ќе се покриваат 50 проценти од трошокот за горивото, а колку пари ќе се добијат, ќе зависи од видот на производството.
За житата субвенцијата изнесува 1.250 денари за хектар. Леќата, кикириките, сончогледот, соја, афион, добиточна и маслодајна репка, памукот и луцерката ќе се подржуваат со 1.875 денари по хектар.
Во градинарството и лозарството земјоделците ќе имаат право на 3.750 денари, а овоштарите ќе добиваат по 3.333 денари за хектар.
Методија Трајков