Собранието ги верификуваше мандатите на новите пратеници
Со 116 гласови „за“, без ниту еден „против“ или „воздржан“, Собранието ги верификуваше мандатите на новите 120 пратеници. Во новиот, десетти состав, 77 пратеници се мажи, а 43 жени. Претседател на законодавниот дом ќе се избере тогаш, кога ќе се создаде парламентарно мнозинство. Конститутивната седница се одржа под посебни протоколи за заштита од коронавирусот...
Со 116 гласа за и ниту еден против или воздржан – Собранието ги верификуваше мандатите на новите 120 пратеници. Народните избраници седнаа во клупите, 28 од нив беа и во стариот состав. Нов претседател на Законодавниот дом сѐ уште не е избран, тоа ќе се случи кога ќе се формира парламентарното мнозинство. Дотогаш седниците ќе ги води пратеникот Талат Џафери.
Во Законодавниот дом, коалицијата „Можеме“ предводена од СДСМ е претставена со 46 пратеници, коалицијата „Обнова“ на ВМРО-ДПМНЕ со 44, ДУИ- 15, коалицијата на Алијанса на Албанците и Алтернатива 12, Левица два пратеника и ДПА - еден. Просечната возраст на пратениците е 45 години, а најмлада е 23-годишната Артина Ќазими од Коалицијата на Алијансата за Албанците и Алтернатива. Во новиот состав, 77 пратеници се мажи, а 43 жени.
Конститутивната седница се одржа во свечената сала „Купола“ под строги здравствени протоколи за заштита од Ковид-19 и со рачно гласање.
Марина Стојанова- Тонева