Царовска: Се подготвуваат три сценарија за тоа како ќе се одвива новата учебна година

„Најдобро би било, новата учебна година да започне  со ученици во училиштата“, изјави министерката за образование и наука, Царовска. Сепак, ресорот подготвува резервни сценарија, едното за настава со ротации и другото, со систем каде што учениците од повисоките класови би следеле онлајн настава, што, секако, ќе зависи од епидемиолошката состојба.

„Сите, и јас и премиерот Зоран Заев и министерот за здравство Венко Филипче, сакаме учебната година да почне со првото сценарио, целосно отворање на училиштата согласно здравствените протоколи за сите одделенија и сите години. Второто сценарио е со физичко присуство да одат учениците од прво до четврто одделение, останатите онлајн. Третото сценарио е да бидат поделени во групи, една недела да оди една група ученици, друга недела втора група ученици“, кажа Царовска на отворање на нова спортска сала во Волково.

Учебната година 2020/2021 почна на 1 октомври, и со физичко присуство одеа учениците од прво до трето одделение, како и некои стручни училишта или училишта низ земјава кои ги исполнуваа условите согласно ковид протоколите. Сите други посетуваа онлајн настава.