Пендаровски: Направивме попис со сите нишани

Направивме успешена статистичка операција што ги запазува сите европски стандарди, изјави денеска претседателот Стево Пендаровски. Според него, самиот факт што после 20 години успеавме да направиме попис е успех само по себе.

„Направивме попис со сите нишани, кој не отстапува од традицијата на направени пописи што ја имавме и ние и регионот и континентална Европа, во изминатите неколку децении. Не станува збор за попис најдобар во историјата на Европа, туку станува збор за попис кој ги запазува највисоките стандарди за попишување што ги има ЕУ“, изјави во Прилеп претседателот на државата, Стево Пендаровски.

Оваа оценка, Пендаровски ја базира не само од она што го слушнал на вчерашната презентација на резултатите, туку и од коментарите дадени од експертот ангажиран од страна на ЕУ.

Претседателот посочи дека секогаш има контроверзи, особено кај нас на балканскиот регион, каде сме измешани и во религиозна и од политичка смисла. Тој наведе дека она што го знае од разговорите со неколку експерти, не постои попис воопшто во Европа и пошироко, кој нема одредена бројка на лица кои не се опфатени со пописот.