Генералот Митруцикос, нов командант на Бригадата на Југоисточна Европа стационирана во Куманово

Бригадниот генерал Евангелос Митруцикос од грчката армија е новиот командант на Бригадата на Југоисточна Европа, чиј домаќин до 2026 година е Северна Македонија.

На свеченото примопредавање на должноста од генералот Аристеидис Илиопулос на генералот Евангелос Митруцикос, присуствуваше заменикот министер Башким Хасани кој порача дека оваа бригада е успех за целиот регион и за Северна Македонија зашто претставува прво учество на припадници на Армијата во мултинационална средина.

„Тоа беа нашите први чекори во нашата определба да бидеме дел од меѓународните мировни мисии и да го дадеме својот придонес кон зачувување на стабилноста и безбедноста во регионот и во меѓународната заедница. Со основањето, нашите припадници ја добија можноста да работат во мултинационална средина каде ги калеа клучните вештини и способности кои подоцна ги пренесуваа на своите колеги во мисиите во Ирак, Авганистан, Босна и Херцеговина и Либан“, порача заменикот министер.

Хасани подвлече дека посветеноста и професионалноста на припадниците на Армијата во оваа Бригада беше првиот чекор во стекнувањето на висока доверба која денес ја имаат сите членки и партнери на НАТО во припадниците на Армијата. Додаде дека Бригадата стана симбол на обединетост и на соработка во нашиот регион и затоа од особена важност е земјите да продолжат заедно да придонесуваат во регионалната стабилност.