Пресуда за случајот „Плацеви на Водно“
Груевски доби 7 години затвор за случајот „Плацеви на Водно“. Мијалков е осуден на 1 година и три месеци, а бизнисменот Орце Камчев на 1 година затвор. Двегодишна условна казна за другите двајца обвинети...
Седум години затвор за поранешниот премиер Никола Груевски. Ваква пресуда донесе Кривичниот суд за случајот Плацеви на Водно. Судот оцени дека виновен е и поранешниот шеф на УБК Сашо Мијалков на кого му изрече казна затвор во траење од 1 година и три месеци. Бизнисменот Орце Камчев, ако пресудата стане правосилна ќе помине една година зад решетки, а за неговата мајка обвинението е повлечено поради застареност на делото. Изречени се и две условни казни. Имотот стекнат незаконски ќе биде конфискуван.
Со поголемиот дел од пресудите обвинителката Стефанова е задоволна, но за Груевски вели – казната е ниска.
Одбраната на Мијалков веднаш најави жалба. Правда ќе бараат пред Апелацискиот суд.
Во обвинението стои дека поранешниот премиер Груевски со пари од донации на ВМРО-ДПМНЕ во висина од 1,3 милиони евра купил – плацеви на Водно, станови во Скопје и земјиште во Крушево. Останатите обвинети се товарат дека му помогнале. Во шемата на купување на имотот биле вклучени и офшор компании.
Анита Д. Велковска