Се зголемуваат замрзнатите цени на овошјето и зеленчукот
Нова корекција на цените на овошјето и зеленчукот. Владата ќе ги одмрзне ограничените цени. Ќе важат од утре. Дел ќе поскапат за два, некои за пет, а други за десет денари, но нема да бидат повисоки од 100 денари. Пазарџиите лути, купувачите нервозни, инспекторите на терен...
Поскапуваат ограничените цени на дел од зеленчукот. Доматите и краставиците ќе чинат до 95 денари, пиперките до 100, а леќата 110 . И кромидот ќе се продава за 10 денари повеќе, а поскапува и гравот. Корекциите, Владата ги оправдува со зголемената увозна вредност на овие производи за околу 30 насто, согласно фактурираното во царинската управа. Бектеши вели, на дневна основа ќе се прават пресметките. Уверува, инспекторите се на терен, утврдените залихи од магацините ќе бидат изнесени, на рафтовите и пазарите има доволни количини.
А, на пазарите потрошувачите се жалат дека тезгите за домати се празни, а таму каде што ги има, цените сè уште се многу високи. На тезгите се продаваат и првите сезонски домашни производи. Продавачите велат, со подобар квалитет, но и со повисока цена од увезените.
Пред велигденските празници, во месарниците јагнешкото луксуз, но се чека ред. Цената на другото месо иста, велат купувачите.
Од Економија велат, континуирано се консултираат со коморите и увозниците и одлуките за замрзнати цени ги носат врз основа на потребите на граѓаните.
Продолжуваат и контролите за тоа, како се реализира увозот на овошје и на зеленчук во последните месеци.
Александра Спировска