2,1% раст и стабилизирање на инфлацијата во 2023-та година, прогнозира Народната банка

Народна банка проектира раст на македонската економија од 2,1 процент, стабилизирање на инфлацијата која ќе се движи меѓу 8 и 9 насто, што е резултат на претпоставките за намалување на цените на енергенсите и ублажување на ценовните притисоци и кај храната. Според гувернерката Бежоска, од глобалните случувања зависи, дали овие проекциите ќе бидат остварливи.

Народна банка очекува и стабилизација на цените, подобра глобална економија и закрепнување на најзначајните трговски партнери. Тоа, вели Бежоска, би придонело за натамошно стеснување на дефицитот кај тековните трансакции на 3,2% од БДП во 2024-та година и 2,7% од БДП во 2025-та година. Финансиските нето-приливи пак, во наредните две години во целост би го финансирале дефицитот на тековната сметка и ќе овозможат дополнителен раст на девизните резерви. Кај странските инвестиции се предвидува раст од 3,7 проценти.

Со слична прогноза за македонската економија излезе и ЕБОР. Европската банка  прогнозира раст на БДП од два насто, додека во цел Западен Балкан тој ќе биде 2,2 проценти. Пооптимистички прогнози за в година. Според ЕБОР, македонската економија ќе има раст од 3 проценти. Во извештајот дополнително е наведено дека на економските перспективи на Западен Балкан ќе влијаат и инфлаторните притисоци и послабите изгледи на напредните економии во Европа.

Викторија Милевска