МЗШВ: Аплицирајте за субвенции по обработлива земјоделска површина за сите полјоделски култури, лековити, ароматични и зачински растенија

Министерството за земјоделство, шумарство и водостопанство ги повикува земјоделците навремено да аплицираат за директните плаќања од програмата за 2023 година, по обработлива земјоделска површина за сите полјоделски култури, лековити, ароматични и зачински растенија, освен за тутун.

Како корисници на овие субвенции се јавуваат земјоделски стопанства кои во производната 2022/2023 година имаат засеани и ожнеани површини со следните култури: пченица, јачмен, пченка, ’рж, овес, ориз, тритикала, хељда, сирак, суданска трева, просо, хмељ, лен, леќа, кикирики, соја, сончоглед, маслодајна репка, добиточна репка, афион, шеќерна репка, памук, анасон, фацелија, граор, еспарзета, добиточен грашок и наут (слануток), како и површини засеани или одржувани со луцерка, лековити, ароматични и зачински растенија.

Минималната засеана површина збирно за сите култури која земјоделските стопанства треба да ја имаат е 0,5 ха во производната 2022/2023 година. Висината на директните плаќања кај оваа мерка за сите наведени култури изнесува 6.000 денари по хектар.

Земјоделските стопанства кои во производната 2022/2023 имаат засеани и ожнеани површини од листата на значајни култури пченица, јачмен, пченка, сончоглед и маслодајна репка и притоа имаат употребено сертифициран семенски материјал остваруваат право на дополнителна субвенција. Право на дополнителни субвенции имаат и стопанствата кој имаат засеани површини под ориз без употреба на сертифициран семенски материјал.

Висината на дополнителната субвенција за пченица, јачмен и пченка изнесува 7.000 денари по хектар, со употреба на сертифициран семенски материјал согласно минимално употребената количина на семе по хектар, со исклучок на производството за биомаса наменето за гасни биоцентарали каде дополнителна поддршка не се плаќа.

Кај сончогледот и маслодајната репка висината на дополнителните плаќања изнесува 4.500 денари по хектар со употреба на сертифициран семенски материјал. Додека пак за оризот висината на дополнителните плаќања изнесува 12.000 денари по хектар без употреба на сертифициран семенски материјал.

Крајниот рок за поднесување на апликации за субвенции за 2023 година за растително и сточарско производство е до 30 јуни 2023 година. Земјоделците барањата можат да ги достават секој работен ден во канцелариите на подрачните единици на МЗШВ или преку електронски преку веб-страницата на Платежната Агенција.