Битиќи: Во новиот пакет антикризни мерки ќе бидат опфатени и пензионерите

Пензионерите ќе бидат опфатени со новиот пакет на антикризни мерки, исто како што беа опфатени минатата година и на почетокот на оваа година преку енергетскиот пакет кои им се нудеше, изјави вицепремиерот задолжен за економски прашања, координација на економските ресори и инвестиции, Фатмир Битиќи во интервју за национална телевизија.

„Имаме закон со кој два пати годишно ги усогласуваме пензиите, со одредена методологија која е соодветна и дава резултати. Дополнително со носењето на новиот закон за минимална пензија ќе го заокружиме целиот процес на реформа и проблемот со пензионерите ќе го оставиме настрана. Со ова, и следната Влада нема да има потреба да се занимава со оваа проблематика“, изјави вицепремиерот Битиќи, притоа дополнувајќи дека постојат и поубави работи за луѓето во третата доба, а за кои ќе треба да се зборува, како што е грижата за нив или домашната нега.