Минималната плата ќе се зголеми од јануари 2015-та

Износот на минималната плата во Македонија ќе се зголеми од јануари 2015-та. Планирани се и законски измени со кои ќе се зголемат казните за работодавците кои нема да исплаќаат минимална плата, најави министерот за труд и социјална работа, Диме Спасов.

„Со направените измени дефиниравме дека покачувањето на минималната плата следната година ќе започне од почетокот на годината, односно од 1 јануари 2015 година, при што минималната плата од 8.800 денари ќе се зголеми и ќе изнесува 9.590 денари, за во јануари 2016 година да се зголеми на 10.080 денари“, рече министерот Спасов.

Државниот инспекторат за труд при своите контроли утврдил дека 46 работодавачи не им ја исплаќале минималната плата на своите вработени. За да се спречат ваквите злоупотреби врз работниците, ќе растат казните и ќе изнесуваат од 8.000 до 10.000 евра за сите оние кои ќе го заобиколат законот, а дополнителна казна ќе плати и одговорното лице.

Колку од компаните не го исплатиле регресот за годишен одмор ќе се утврдува  од почетокот на наредната година.