Над 1.700 мигранти биле спасени во близина на брегот на Либија, со што вкупниот број на луѓе кои неделава биле спасени во Средоземното Море се искачил на над 14.000.
Британските медиуми посочуваат дека и натаму се засилува напливот на мигранти кон јужното крајбрежје на Европа.
Околу 8.000 припадници на силите за безбедност се отстранети од должноста во најновата чистка во Турција по неуспешниот обид за државен преврат во земјата.
Отстранетите припадници на силите за безбедност се обвиниети за врски со организаторите на пучот.
Најмалку четворица атентатори самоубици рано изутрината извршија напад во регион населен со христијани во северозападен Пакистан.
Во нападот биле ранети и тројца припадници на безбедносните сили и двајца чувари.
Косовското Собрание ја одложи расправата за демаркацијата на границата со Црна Гора. Владата реши да го повлече предлогот од дневен ред во Собранието, но, како што рече премиерот Иса Мустафа, тоа не значи дека се повлекува од договорот.
Американските муслимански лидери предупредија да не се толкува погрешно одбележувањето на Бајрам кој годинава се празнува на 11 септември, односно 15-годишнината од нападот на Ал Каеда на Светскиот трговски центар во Њујорк и врз Пентагон во Вашингтон.
Стотина косовски полицајци со опрема за разбивање на демонстрации се распоредени околу зградите на косовското Собрание и Владата во центарот на Приштина, каде што се одржуваат протести против одлуката за демаркацијата со Црна Гора.
Во сила стапи прекинот на огнот во конфликтната зона во Источна Украина. Договорот беше постигнат на средбата на Контакт групата на 26 август во Минск, поради почетокот на новата учебна година.
Најмалку 11 луѓе загинаа, а 17 се водат за исчезнати во тајфунот во северна Јапонија. Во поплавите загинаа 10 лица, од кои деветмина во еден дом за стари лица.
Уште едно тело е пронајдено во близина на старечки дом, а еден човек загина во градот Куџи.
Бразилската Влада го отповика амбасадорот во Венецуела за консултации. Каракас го осуди отстранувањето од функција на претседателката Дилма Русеф, нагласувајќи дека станува збор за „парламентарен пуч“.
Американскиот претседателски кандидат Доналд Трамп ја бранел идејата за изградба ѕид на границата меѓу Мексико и САД, за време на неговата средба со мексиканскиот претседател Пена Њето.
