Полагањето на екстерните испити од матурата за учебната 2025/2026 година почнува на 6 јуни, а пријавени се вкупно 14.587 ученици.
Според податоците на Државниот испитен центар, 12.184 ученици ќе полагаат државна матура, 2.276 државна стручна матура, а 127 државна уметничка матура.
Израелската војска нотира дека воздухопловните сили работат непрекинато, на сите арени, напаѓајќи низ цел Либан. Акциите следуваат во услови на ескалација на тензиите и покрај тековното примирје. Израелските трупи ја преминаа реката Литани.
Во Скопје се одржа 4-от Форум за културна дипломатија „Скопје 2026“, посветен на темата „Од крстопати кон поврзувања: Културната дипломатија и иднината на глобалниот дијалог“.
Прерано е да се каже кога и дали САД и Иран ќе го финализираат договорот за прекин на огнот за уште 60 дена и ќе ги почнат разговорите за иднината на нуклеарната програма. Вашингтон се надева дека Техеран преговара со добра волја.
Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е умерен, информираат од АМСМ.
На граничните премини, од македонска страна, нема подолги задржувања за влез и излез од државата.
Времето денеска ќе биде сончево со мала до умерена локална облачност. Ќе дува слаб до умерен, а наместа долж Повардарието повремено засилен ветер од северен правец.
Минималната температура ќе биде во интервал од 7 до 16, а максималната ќе достигне од 23 до 31 степен.
Утре (29.05.2026) поради верскиот празник Задушница, од страна на Единицата за безбедност на патниот сообраќај при СВР Скопје ќе бидат преземени мерки за посебен режим на сообраќај за безбедно и непречено одвивање на сообраќајот, соопштија од МВР.
Советот на Народната банка на редовната седница ја разгледа Годишната информација за плаќањата во државата за 2025 година, при што беше констатиран натамошен раст на безготовинските плаќања и на користењето дигитални канали за извршување платежни трансакции.
Од 1 јули 2026 година ќе се изврши дополнително намалување и целосно усогласување на царинските стапки со оние што важат во Европската Унија за 70 стоки што како суровини, репроматеријали и компоненти се користат во домашната индустрија.
По повод Светскиот ден без тутун, Министерството за здравство, заедно со ИЈЗ и СЗО се приклучува на одбележувањето на глобалната кампања на СЗО на тема „Разоткривање на привлечноста – спротивставување на зависноста од никотин и тутун“.
