Утре во Македонија ќе преовладува променливо облачно и на повеќе места нестабилно време со пороен дожд и грмежи, локално во форма на невреме со појава на град.
Ќе дува засилен северен ветер што ќе услови пад на температурите.
Максималната дневна ќе достигне до 22 степена.
Министерството за внатрешни работи соопшти дека продолжува со расветлување на собраниските настани од 27-ми април и со идентификација на сите учесници.
Во полиција биле повикани 28-годишник од Виница и тројца скопјани. Тие се ослободени, но ќе има соодветни поднесоци.
Изречени пресудите за деветмина обвинети за настаните во Собранието. Сите добија условни казни. Првоoбвинетиот доби една ипол година условно, ако за пет години не го повтори делото, а преостанатите по шест месеци, ако не го повторат делото во рок од една година.
Во скопскиот Кривичен суд денеска беше одложена за 3-ти јули главната расправа за случајот „Тврдина 2“, бидејќи не бил повикан ниту еден од сведоците.
Коалицискиот партнер на Заев, Зијадин Села, изјави дека ниту потпишал, ниту има намера да потпише или почитува гаранција побарана од претседателот Иванов, велат од ВМРО-ДПМНЕ.
Лидерот на СДСМ и мандатор за нова влада, Зоран Заев најави дека денеска почнуваат разговорите со партиите кои треба да бидат дел од владата, за распределба на ресорите.
Излезот од политичката криза сигурно не е во просто менување на мнозинството во Собранието.
Претседателот Иванов испрати телеграма со сочувство до Кралицата на Обединетото Кралство на Велика Британија и Северна Ирска, Елизабета Втора. Нападот во Манчестер го оцени како брутален.
По терористичкиот напад што синоќа се случи во англискиот град Манчестер претседателот на Европската комисија, Жан-Клод Јункер изјави дека е шокиран од грозоморниот чин и порача дека овој акт на тероризам го скршил неговото срце.
Исламска држава официјално презеде одговорност за нападот во Арената на Манчестер во кој загинаа над 20 лица, а 60-тина беа повредени.
