Последните информации на Државната изборна комисија покажуваат дека излезноста до 11 часот е 10,34 проценти.
На седмите локални избори право на глас имаат 1.824.864 гласачи, што е најмногу од сите локални избори досега. Гласачкото право до 11 часот го искористиле 175.058 избирачи.
Од вкупно 1.824.864 избирачи, до 9:30 часот до ДИК пристигнале податоци од 1.325 избирачки места или 38,07 отсто.
Во 80-те избирачки места во Општина Штип гласањето тече без поголеми проблеми. Претседателот на Општинската изборна комисија, Виктор Вацев вели дека од утринава имаат околу десеттина граѓани, на кои апаратите за отпечаток од прст не им ги препознаваат отпечатоците.
Општинската изборна комисија во Битола информира дека утрово почна изборниот процес во Битола без поголеми проблеми. Според единствениот избирачки список 80.882 граѓани имаат право на глас. Изборниот процес се реализира на 170 избирачки места во Општина Битола.
Изборниот процес на седмите локални избори од независноста на нашата држава во општина Охрид започна навреме,во демократска атмосфера и со мали проблеми. Во избирачкиот список се запишани 52.477 лица кои своето демократско право ќе можат да го остварат на 88 избирачки места.
Државната изборна комисија, и за овие избори ја активира бесплатната телефонска линија 0800- 555-444, на која граѓаните ќе можат да поставуваат прашања или да оставаат коментари. Пожелно е да бидат оставени и податоци за контакт, за да можат да се добијат одговори на поставените прашања.
Граѓаните на првиот круг од Локалните избори денеска можат да пријават каква било повреда на избирачкото право на беслатната телефонска линија 0800-54321, која ќе функционира во периодот од од 7:00 до 19:00 часот во канцеларијата на Народниoт правобранител.
Првпат на Локалните избори 2021 во процесот на гласање ќе се применуваат уреди за биометриска идентификација на гласачите. За потребите на 3480 избирачки одбори ДИК од германската компанија „Дермалог” набави 4000 терминали.
За Локалните избори 2021 што се одржуваат денеска акредитирани се вкупно 1.045 домашни и странски набљудувачи и преведувачи.
Денеска се одржуваат седмите по ред локални избори. Во 7 часот беа отворени сите 3.480 избирачки места, а право на глас според избирачкиот список имаат 1.824.864 граѓани.
