За денеска се најавува променливо облачно време со повремени врнежи од дожд, а во јужните делови поројни дождови кои ќе бидат проследени со грмежи.
Ќе дува засилен ветер од северен правец, особено долж Повардарието и во Пелагонија, информираат од УХМР.
Грчкиот шеф на дипломатијата Коѕиас во четврток доаѓа во Македонија. Европската перспектива на државата- тема на разговор со министерот за надворешни работи, Никола Попоски.
Коѕиас во Скопје ќе се сретне со македонски дипломати, а ќе има и свое обраќање.
Состојбата со земјоделското производство е вообичаена за овој период од годината. Влажноста во почвата е добра, особено во подлабоките слоеви што ќе придонесе за зреењата на овошките, раните сорти на десертно грозје како и зреењето и бербата на тутунот.
Сообраќајот на сите државни патишта се одвива без забрани, по наместа влажни коловози. Интензитетот на сообраќај на патните правци надвор од градските средини е зголемен.
Во Собранието на Република Македонија денеска седници ќе одржат комисиите за земјоделство, шумарство и водостопанство, за образование, наука и спорт и Законодавно-правната комисија.
„Кога зборува правдата политиката треба да молчи“ изјави лидерот на ДПА Мендух Тачи по едночасовниот распит во Специјалното јавно обвинителство. Не откри за кој случај бил повикан.
Утре во Македонија ќе преовладува променливо облачно посвежо и ветровито време со повремени врнежи од дожд, локално поројни со грмежи.
Турска бања, сауна, базени и џакузи, по 12 години болницата „8-ми Септември“ ќе добие нов, модерен центар за физикална терапија. Дел од услугите ќе ги покрива фондот за здравствено осигурување, а дел ќе бидат и комерцијални.
До петок се продолжува периодот на хуманитарната акција на Црвениот крст за собирање средства и пари за загрозените во поплавите во Скопско.
Досега се собрани околу 740 илјади евра во пари, средства и во опрема кои ќе бидат дистрибуирани по утврдувањето на критериумите за распределба.
Почна исплатата на авансната помош на загрозените во неодамнешните поплави. Во секое село има пункт на кој граѓаните се информираат дали на нивната сметка пристигнала паричната помош. Парите ќе се префрлаат етапно во следниот период на сите загрозени семејства.
