Утре во Македонија ќе преовладува сончево и студено време со ниски утрински температури и со слаб до умерен ветер од северен правец особено долж Повардарието.
Максималната температура ќе достигне до 14, во Скопје во текот на денот се очекува температура до 12 степени.
Во скопска Апелација, јавна седница на која претседателот на ВМРО-ДПМНЕ, Никола Груевски и неговата одбрана, аргументираат зошто судот треба да му го врати пасошот, којшто му беше одземен како превентивна мерка за предметот „Титаник“, по барање на Специјалното јавно обвинителство.
Горивата поскапуваат од полноќ- одлучи Регулаторната комисија за енергетика. Цените на Еуросупер БС-95, Еуродизелот и екстра лесното масло за домаќинство се зголемуваат за еден денар, а за половина денар поскапува Бензинот од 98 октани. Повисока цена ќе има и мазутот.
Шпанскиот министер за надворешни работи Алфонсо Дастис ја исклучува независноста на Каталонија, но не и пошироката автономија. Разрешувањето на регионалниот лидер Карлес Пуџдемон не му го одзема правото за учество на предвремените избори.
За СДСМ и ДУИ, фер и демократски избори, ВМРО-ДПМНЕ и Алијансата за Албанците не ги признават реултатите.
Резултатите од двата изборни круга донесоа промени во локалната власт во Македонија. Со градоначалничката функција во 81 општина ќе раководат шест жени и 75 мажи.
Парламентот на курдскиот регион во Ирак го прифати барањето на Масуд Барзани, претседателот на ирачката Курдистанска регионална влада, да не го обнови мандатот кој истекува на први ноември.
„Дијалогот меѓу Барселона и Мадрид е решението за шпанската криза, а разрешениот каталонски лидер Карлес Пуџдемон не добил понуда за политички азил во Белгија“, потенцира премиерот Шарл Мишел.
Никола Ристановски доби награда за најдобар актер на 25. Меѓународен театарски фестивал на класици „Вршачка театарска есен“ во Србија. Наградата ја доби за улогата Иванов во истоимената претстава по текст на Антон П. Чехов, во продукција на Народно позориште Белград. Ова е негова 48 награда.
Шефот на грчката дипломатија Никос Коѕијас изјави дека разликите за името не значат дека Грција е против постоењето на Македонија. Смета дека освен името, главен проблем е иредентизмот.
