Утре во Македонија ќе преовладува променливо облачно и значително посвежо време со повремен локален дожд особено во западните делови.
Ќе дува умерен, а долж Повардарието повремено засилен северозападен ветер.
Дневната температура ќе опадне за околу 8 степени.
Поширок консензус при подготовката на законските проекти со активно учество и на опозицијата е главниот заклучок од дебатата во Националниот совет за евроинтеграции.
Задоцнета дијагноза и ненавремено лекување доведуваат до сериозни последици кај децата со нарушен раст, велат од Здружението на родители на деца со ендокринолошки заболувања. Лекувањето и добивањетона терапија остануваат проблеми со кои во земјава се соочуваат стотина деца.
Се исцртуваат контурите на Законот за амнестија. Владата предлага целосно да бидат ослободени сите лица кои издржуваат затворска казна до 6 месеци, а на осудениците до 5 години, казната ќе им се намали за 30%, појасни владиниот портпарол Бошњаковски.
Ќе има меѓународна истрага за кумановските случувања во Диво насеље, потврди ресорниот министер Оливер Спасовски. За тоа кој стои зад овие настани и кои се извршителите јавноста ќе дознае откако ќе се спроведе отворена истрага.
Претседателот Ѓорге Иванов упати писмо со сочувство до неговиот мексикански колега, Енрике Пења Нието. Жали за загубените животи во катастрофалниот земјотрес.
Анѓушев потврди дека ја користи функцијата вицепремиер во владата за да влијае врз тендерските постапки распишани од државните претпријатија, велат од ВМРО-ДПМНЕ. Ова е само доказ дека со право реагиравме за злоупотреба на неговата службена положба, изјави Бојан Стојаноски од ВМРО-ДПМНЕ.
Во подрачните канцеларии на ДИК, почна собирањето на потребните 10 илјади потписи за распишување референдум што го покренува граѓанската иницијатива 450 породилно.
Ураганот „Марија“, кој достигна петта категорија, се движи кон американските Девствени Острови и Порторико, откако претходно го погоди малиот карипски остров Доминика. Истовремено, и тропската бура „Хосе“ може да нанесе штета на американското источното крајбрежје.
Историјата се повторува. Стотици жртви и повредени во земјотресот од 7,1 Рихтер кој погоди неколку мексикански држави на годишнината од катастрофалниот потрес од 1985 година во кој настрадаа 10 илјади луѓе. Најголем број загинати има во државата Морелос.
