24 полицајци се повредени, а 300 мигранти приведени во нередите во бугарскиот бегалски камп Харманли.
Над 250 полицајци беа мобилизирани во операцијата против револтираната група која е незадоволна од воведениот карантин, поради појава на шуга во кампот.
Франција ќе им дава по 2.500 евра на мигрантите кои доброволно ќе се вратат дома. Покрај платен авионски билет, ќе добијат и до 10 илјади евра финансиска помош кога ќе стигнат во татковината.
Над 30 цивили се убиени, вклучувајќи и пет деца, во воздушните напади врз Алепо. Сириските сили веќе два дена го бомбардираат источниот дел на градот контролиран од бунтовниците.
Илјадници граѓани се евакуирани во Хаифа поради пожарите кои, според израелските власти, се подметнати од политички мотивирани пиромани. Противпожарните единици имаат поддршка од резервниот состав и од полицијата на Израел.
Европскиот парламент усвои резолуција за замрзнување на преговорите со Турција за членство во ЕУ поради хајката на владата во Анкара по неуспешниот обид за пуч.
Над 10.500 државни службеници во Турција добија отказ поради наводна поврзаност со Курдската работничка партија.
Борбата против ПКК во југоисточна Турција каде што Курдите се мнозинство трае неколку години.
Над 60 луѓе загинаа на градилиште во Кина откако се урнало скеле. Инцидентот се случил на платформа за систем за разладување на електрична централа.
Во тек е спасувачка операција за извлекување на луѓето од урнатините.
За прв пат во последните 5 децении, граѓаните на Токио видоа ноемвриски снег. Заснежените коловози предизвикаа забавување на сообраќајот.
„Денеска излегов порано од дома. Малку ми е тешко да пешачам, а и не гледам баш најјасно.“
Земјотрес од 6,1 рихтери ја погоди јапонската префектура Фукушима. Издадена е тревога за цунами, но според метеоролозите, висината на брановите ќе биде минимална така што нема да предизвикаат штета.
Гувернерот на Јужна Каролина, Ники Хејли прифати да биде амбасадор на САД во Обединетите нации во администрацијата на новоизбраниот претседател Доналд Трамп. Хејли е ќерка на имигранти од Индија, мајка на двајца тинерџери и сопруга на капетан во крајбрежната стража.
